Usafi kipaumbele namba moja cha Mkuu wa Mkoa wa Dar es Salaam

 

Na.Rosetha Gange na Judith Damas

Mkuu wa mkoa wa Dar es Salaam Mhe. Amos Makala leo Mei, 31 2021 amefanya kikao  kazi  na  Madiwani, wakuu wa idara, pamoja na watendaji kata  katika  ukumbi wa Arnatoglou uliopo  Mnazi Mmoja Jijini Dar es Salaam  lengo kubwa likiwa ni kufahamiana na kuwaelekeza vipaumbele vyake akiwa ni  Mkuu mpya  wa Mkoa wa Dar es Salaam ikiwemo usafi,utekelezaji wa ilani ya Chama, kutatua kero za wananchi,utekelezaji wa miradi mbalimbali ya maendeleo,kuwapanga wamachinga pamoja na ulinzi na usalama.

Akizungumza katika kikao hicho Mkuu wa Mkoa wa Dar es Salaam  Mhe. Makala ameipongeza Halmashauri ya Jiji la Dar es Salaam kwa kupata hati safi mara sita (6) mfululizo pamoja na kuwa vinara wazuri katika ukusanyaji wa mapato. Sambamba na hilo amewapongeza madiwani kwa kuwa wasimamizi wazuri katika kuhakikisha asilimia 10% ya  pato la ndani ya Halmashauri inatengwa kwa ajili ya  kuwawezesha wanawake, vijana na  watu wenye ulemavu kupata mikopo .

Aidha, Mhe. Makala amesisitiza suala la usafi katika Halmashauri ya jiji la Dar es Salaam kwani hali ya usafi katika Jiji hili hairidhishi  hivyo amewataka watumishi pamoja na watendaji wa Kata kupanga mikakati ya haraka ili kulirejesha Jiji katika mandhari ya usafi kwani ndio kitovu cha wageni katika nchi yetu ya Tanzania.

“Jiji la Dar es salaam ni Jiji kubwa,watu mbalimbali wanafika hapa,Kwa hali ilivyo sasa hali si nzuri.Sijaridhishwa na hali ya usafi katika jiji la Dar es Salaam kwani hapa ndio uso wa Tanzania.Lazima jitihada za haraka zifanyike.”

Katika kuhakikisha suala hili linatekelezeka Mh.Makala amekusudia kuzindua kampeni ya usafi katika jiji la Dar es salaam na kuwasisitizia watendaji wote wa jiji wakawe wasimamizi wa zoezi hili na kuwa usafi uanze kwenye kaya,mitaa, kata na katika Halmashauri ya jiji lao.

Sambamba na hilo Mhe. Makala amesema kuwa atakuja na mpango wa kuwapanga upya  wamachinga na wafanyabiashara ndogo ndogo katika jiji la Dar es salaam ili jiji liwe kwenye muonekano mzuri na liwe katika hali ya usafi. Pia amesisitiza  kuwa kutokuwa na usimamizi na ufuatiliaji madhubuti kunafanya jiji kuonekana katika hali ya uchafu  na wahalifu hutumia vibanda hivyo kama maficho yao wakati wa usiku.

Akitoa shukrani kwa niaba ya watendaji wote wa Jiji la Dar es Salaam Meya wa Halmashauri ya Jiji la Dar es Salaam  Mh.Omary Kumbilamoto  alimpongeza Mh.Makala kwa hotuba nzuri na kuahidi kuyatekeleza yale yote aliyowaagiza na kumuhakikishia  ushirikiano wa kutosha katika kutekeleza majukumu yake.