Mwenge wa Uhuru 2021 watembelea Mradi wa Ujenzi wa Madarasa Shule ya Sekondari Ilala-Kasulu.

 Na: Miraji Omary

Kiongozi wa Mbio Maalum za Mwenge wa Uhuru Kitaifa 2021, Luteni Josephine Paul Mwambashi, Tarehe 18 Agosti, 2021 alitembelea mradi wa ujenzi wa Shule ya Sekondari Ilala-Kasulu kwa ajili ya kuweka Jiwe la Msingi katika Mradi wa ujenzi wa vyumba vya madarasa ya ghorofa, ambao umegusa kigezo cha nne (4) kipengele cha (4.5) kinachoonesha jinsi Wilaya ilivyo wekeza na kusimamia miundombinu ya elimu. Mradi huo ambao ulianza Aprili 2019 na unatarajiwa kukamilika Mwaka huu wa fedha 2021/2022.

 Mradi huo ambao unajengwa kwa Awamu Tatu na utagharimu jumla ya Shilingi Milioni 850,338,971.30 hadi utakapokamilika. Hadi kufikia sasa Mradi umefikia awamu ya Pili na fedha ambazo tayari zimekwishakupokelewa ni kiasi cha Shilingi milioni 544,054,458.32 ambapo Shilingi milioni 168,577,438.30 zimekwisha tumika katika awamu ya Kwanza na Shilingi milioni 357,477,020 zimetumika awamu ya Pili hadi ujenzi ulipofikia.

Mkuu wa shule Bw. Hamisi Ernest Masutu akisoma taarifa za mradi huo kwa kiongozi wa mbio maalum za Mwenge Luteni Josephine Paul Mwambashi amesema kuwa mradi umetumia eneo dogo kutokana na ufinyu wa maeneo katikati ya mji na kuwezesha kusajili Wanafunzi wengi, Kupunguza msongamano wa wanafunzi darasani. Pia mradi umesaidia kuhudumia Watoto wa Kata zilizo karibu hivyo kupunguza umbali wa Wanafunzi kwenda shule za pembezoni kitu ambacho kimesaidia kuongeza ufaulu.

Aidha mkuu wa shule amesema wanaenda sambamba na kaulimbiu ya Mwenge maalum wa Uhuru ya mwaka 2021, isemayo “Tehama ni Msingi wa Taifa Endelevu, Itumie kwa Usahihi na Uwajibikaji” ambapo shule ya Sekondari Ilala Kasulu inatumia mifumo ya TEHAMA (PREMS, BEMIS, NA FFARS) kwa baadhi ya shuguli, ambazo imerahisisha utendaji kazi kama vile Usajili wa Wanafunzi, Uhamisho wa Wanafunzi, Uandaaji wa ripoti za Wanafunzi pamoja na Shughuli za Uhasibu kama ilivyo kwa shule zingine katika Wilaya.

Pia mkuu wa shule ameongezea kwa kusema katika shule ya Sekondari Ilala Kasulu, sekta ya elimu ipo mstari wa mbele katika mapambano dhidi ya Rushwa kupitia kaulimbiu ya kudumu isemayo “Kupambana na Rushwa ni Jukumu Langu”, hivyo shule kwa kushirikiana na Taasisi ya Kupambana na Kuzuia Rushwa (TAKUKURU)  imeanzisha Kikundi elimishi juu ya kupambana na Rushwa mashuleni ili kujenga uelewa kwa vijana juu ya madhara yatokanayo na kutoa au kupokea Rushwa.

Sambamba na hilo Kiongozi wa Mbio Maalum za Mwenge Kitaifa 2021, Luteni Josephine Paul Mwambashi amezindua Klabu ya kupinga na kupambana na Rushwa ya wanafunzi iliyoanzishwa kwa kushirikiana na TAKUKURU, Baada ya taarifa iliyowasilishwa na Mwenyekiti wa klabu Doreen Bernad, ambapo amesema klabu hiyo inaundwa na wanachama wapatao 60, Wavulana 22 na Wasichana 38 wa Shule ya sekondari Ilala Kasulu.

Kiongozi wa Mbio Maalum za Mwenge Kitaifa 2021, Luteni Josephine Paul Mwambashi, akihitimisha ziara yake katika mradi wa ujenzi wa Shule ya Sekondari Ilala Kasulu, amewaasa viongozi wanao simamia miradi mbalimbali kuweza kuonyesha nyaraka zote zinazo husiana na mradi husika pamoja na kushirikisha wanchi wa eneo husika iliwaweze kutambua jinsi mradi unavyo endeshwa.