DC MJEMA AZINDUA KAMATI YA AMANI YA WILAYA ILALA

Na: Heri Shaaban

Mkuu wa Wilaya ya Ilala Mhe. Sophia Mjema, leo amezindua Kamati ya Amani ya Wilaya ya Wilaya Ilala alipokutana na Wajumbe wa Kamati hiyo katika ukumbi wa Mikutano wa Arnatouglou uliopo Mnazi Mmoja.

Akiongea na Wajumbe hao ambao ni kutoka kwenye Taasisi za Kidini na Viongozi wa Usalama Wilaya ya Ilala, wakati wakijiandaa kufanya uchaguzi wa Viongozi wa Kamati hiyo, DC Mjema alisema “nataka mfanye kazi za Wananchi kwa dhumuni la kuisaidia Serikali ya awamu ya Tano” 

Aidha, DC Mjema aliendelea kusema “najua kamati ya Amani Wilaya ya Ilala itakuwa na majukumu mengi katika kuisaidia Serikali ya Rais John Magufuli  na kazi kubwa watakayofanya Kamati hiyo ni kushirikiana pia na Kamati ya Ulinzi ya Wilaya”.

''Naomba Kamati hii ambayo nimezindua leo ifanye kazi kwa ushirikiano na kudumisha umoja, Rais John Magufuli ameweka utaratibu wa kukutana na Viongozi wa dini sisi kama Wilaya ya Ilala utaratibu wetu tutakuwa tunakutana na Kamati ya Amani ambayo ndani yake ina viongozi wa dini pia " alimalizia kusema.

Wakati huo huo, DC Mjema aliwataka na Wananchi wa Wilaya hiyo kudumisha amani na mshikamano ili kuleta maendeleo katika Wilaya ya Ilala na Serikali kwa ujumla.

Awali Katibu Tawala wa Wilaya ya Ilala, Bi. Sheila Edward alitoa ufafanuzi wa muuondo wa kamati hiyo ambapo alieleza Kamati hiyo inaundwa na wajumbe mbalimbali wakiwemo, Viongozi wa dini, Kamanda wa Polisi Mkoa wa Ilala, Katibu, Mwenyekiti, Mweka Hazina, Makamu Mwenyekiti, Kaimu Katibu na Wanawake wanne Waislamu wawili na Wakristo wawili. 

Kwa upande wake Sheikh wa Wilaya ya Ilala Adamu Mwinyipingu alisema Kamati ya Amani ni chombo muhimu sana katika kuimarisha ulinzi.

Sheikh Adam alisema watafanya kazi kwa ushirikiano katika kuisaidia Serikali katika kudumisha Amani. 

 

Mkuu wa Wilaya ya Ilala Mhe. Sophia Mjema akizungumza na Kamati ya Amani Wilaya ya lala mapema leo wakati akifanya uzinduzi wa Kamati hiyo kwenye Ukumbi wa Mikutano wa Arnatouglou 

Mkuu wa Wilaya ya Ilala Mhe. Sophia Mjema akiwa na Mkurugenzi wa Manispaa ya Ilala Bw. Jumanne Shauri wakati wa uzinduzi wa Kamati ya Amani Wilaya ya Ilala